முகப்பு

உலகில் மனிதன் மட்டும் தனித்து வாழ முடியாத , இயற்கை படைத்த பிற உயிர்களோடும் சேர்ந்தே வாழவேண்டும் என்பது ௮வசியம் என கூறுவது ஏன் ?

மரங்கள் அடர்ந்த நிலப்பகுதி காடு என்று அழைக்கப்படுகிறது. தமிழில் வனம், கானகம், அடவி, புறவு, பொதும்பு போன்ற பல சொற்களால் இது குறிக்கப்படுகிறது.

காடுகள் என்பது வெறும் மரங்கள் மட்டும் கொண்டதல்ல ,     காடுகள் என்பது உயிர் பரவலின் கருவறை ..!
பூமியின் நிலப்பரப்பில் பெரும் பகுதி காடாகவும், பல்லுயிர்கள் வாழும் வீடாகவும் இருந்தன என்பது தான் பூமியின் தொன்மை யான வரலாறு. காடழிப்பின் காணாது போன உயிர்களின் பட்டியல் நீளமானது.

காடழியும் போது ... உயிர் காக்கும் மூலிகைத் தாவரங்களும், காட்டை நம்பி வாழும் பழங்குடி மக்கள் உள்ளிட்ட பல்வேறு உயிரினங்களும் அழிகின்றன.

காடுகள் மழையை மட்டுமன்றி நமது மூச்சுக்காற்றையும் சலவை செய்கின்றன. இந்தியாவில் காடுகளால் பயன் அடையும் மக்கள் சுமார் இருபது கோடிப் பேர் என்பதை நினைவில் கொள்வோம்!

சேலம், தருமபுரி, ஈரோடு, திருச்சி, தஞ்சை நகரங்களில் வாழும் மக்களின் தண்ணீர்த்தேவையை நிறைவேற்றுவது காவேரி தான்! கோவை, திருப்பூர் மக்களுக்கு பவானியும், அமராவதியும், சிறுவாணியும் தான் நீராதாரம். மதுரையை வைகையும், நெல்லையை தாமிரபரணியும் ஈரம் உலராமல் வைத்திருக்கின்றன. இந்த ஆறுகள் இல்லாது போனால் ...தமிழகம் பாலையாய் தகிக்க நேரும்.

ஆறுகள் அனைத்தும் மேற்கு மலைத் தொடர்களில் உற்பத்தியாகி சமவெளி மக்களுக்கு சோறும், நீரும் தருகின்றன. இன்னும் மிச்சமிருக்கும் மழைக்காடுகளை காப்பாற்றினால் தான் ஆறுகளைக் காப்பாற்ற முடியும்!

பூமியில் உயிர்கள் தோன்றி தோராயமாய் ஓராண்டுகள் என கணக்கிட்டால் மனிதன் தோன்றி வெறும் இரண்டு நிமிடங்கள் தான் என்கிறார்கள் இயற்கைவியலாளர்கள். உலகில் மனிதன் மட்டும் தனித்து வாழ முடியாது! இயற்கை படைத்த பிற உயிர்களோடும் சேர்ந்தே வாழவேண்டும்!

காடுகளும், காட்டுயிர்களும் இல்லாத உலகில் மனிதனும் இருக்க மாட்டான்! காடுகளையும், காட்டுயிர்களையும் பாதுகாக்கும் கரிசனத்தோடு உலகெங்கும் உள்ள மக்கள்
அதை அடுத்த தலைமுறைக்கும் பாதுகாத்து கொடுக்க வேண்டும்.
எனவே அதைப்பற்றி தகவல்களை நம்மைச் சுற்றியுள்ள உயிர்களை தமிழில் கொடுப்பதற்கான தகவல் பெட்டகமே இந்த இணையதளம்.